У Мінскай духоўнай акадэміі адбылася першая рэспубліканская навукова-практычная канферэнцыя «Стан і перспектывы развіцця духоўнай адукацыі ў Рэспубліцы Беларусь»

01 снежня 2022

top.jpg

1 снежня 2022 года ў Мінскай духоўнай акадэміі адбылася першая рэспубліканская навукова-практычная канферэнцыя «Стан і перспектывы развіцця духоўнай адукацыі ў Рэспубліцы Беларусь».

Арганізатарамі канферэнцыі выступілі Сінадальны аддзел рэлігійнай адукацыі і катэхізацыі Беларускай Праваслаўнай Царквы, Мінская духоўная акадэмія, Мінская духоўная семінарыя, Інстытут тэалогіі БДУ, Мінскае духоўнае вучылішча. Працу пленарнага пасяджэння ўзначаліў Высокапраасвяшчэннейшы Мітрапаліт Мінскі і Заслаўскі Веніямін, Патрыяршы Экзарх усяе Беларусі.

Звяртаючыся з прывітальным словам да ўдзельнікаў форуму, архіпастыр зрабіў кароткі экскурс у гісторыю развіцця свецкай і духоўнай адукацыі і выказаў надзею на плённую працу канферэнцыі па пошуку шляху адаптацыі духоўнай школы да сучасных умоў, захоўваючы пры гэтым яе місію, памятаючы, што свет мяняецца, але «Іісус Хрыстос учора, і сёння, і навекі — той самы» (Яўр. 13:8).

На пленарным пасяджэнні рэктар Мінскай духоўнай акадэміі, дацэнт, кандыдат багаслоўя архімандрыт Афанасій (Сакалоў) выступіў з дакладам на тэму: «Актуальныя пытанні развіцця вышэйшай духоўнай адукацыі ў Беларускай Праваслаўнай Царкве».

Наступным дакладчыкам пленарнага пасяджэння стаў протадыякан Павел Бубноў, старшы выкладчык кафедры царкоўнай гісторыі і царкоўна-практычных дысцыплін Мінскай духоўнай акадэміі, кандыдат багаслоўя, які выступіў з паведамленнем на тэму: «Ацэнка мэты і задач праваслаўнай духоўнай адукацыі ў творчай спадчыне святых, архіпастыраў і пастыраў XX стагоддзя».

Валодзін Ігар Ігаравіч, старшы выкладчык кафедры маладзёжнай палітыкі і сацыякультурных камунікацый Рэспубліканскага інстытута вышэйшай школы, магістр кіравання, магістр багаслоўя, прадставіў даклад на тэму: «Псіхалагічная гатоўнасць студэнтаў вышэйшых духоўных навучальных устаноў Рэспублікі Беларусь да святарскага служэння».

Завяршальным дакладчыкам пленарнага пасяджэння стаў протаіерэй Дзмітрый Савіч, прарэктар па вучэбнай рабоце Віцебскай духоўнай семінарыі, кандыдат багаслоўя, выступіўшы з дакладам на тэму «Да пытання аб стратэгічным планаванні і прагназаванні кадравай патрэбнасці ў сістэме сучаснай духоўнай адукацыі».

Пасля пленарнага пасяджэння праца канферэнцыі працягнулася ў фармаце тэматычных секцый і круглых сталоў.

Мадэратарам секцыі «Гісторыя і сучаснасць духоўнай адукацыі» стаў Слесараў Аляксандр Валер'евіч, прарэктар па навуковай рабоце Мінскай духоўнай акадэміі, кандыдат гістарычных навук, дацэнт.

Мадэратарам секцыі «Багаслоўская, тэалагічная і свецкая адукацыя: адзінства традыцыяналізму і мадэрнізацыі. Багаслоўска-метадалагічныя аспекты развіцця духоўнай адукацыі» выступіў протаіерэй Сергій Маўсесян, першы прарэктар Інстытута тэалогіі БДУ, кандыдат філасофскіх навук, кандыдат багаслоўя, дацэнт.

Круглы стол «Актуальныя пытанні развіцця сярэдняй спецыяльнай і дадатковай духоўнай адукацыі» ўзначаліў протаіерэй Іаан Задарожын, дырэктар Мінскага духоўнага вучылішча.

Круглы стол «Сістэма акармлення ў вышэйшых духоўных навучальных установах» узначаліў іераманах Агафангел (Будзішын), прарэктар па выхаваўчай рабоце Мінскай духоўнай семінарыі.

Круглы стол «Асноўныя напрамкі, перспектывы развіцця і багаслоўска-метадалагічныя аспекты духоўнай адукацыі ў Рэспубліцы Беларусь» узначаліў ігумен Аўксенцій (Абражэй), намеснік старшыні Сінадальнага аддзела рэлігійнай адукацыі і катэхізацыі БПЦ.

МінДА/Church.by

Чытайце нас у TelegramViberInstagramВКонтакте

Фотарэпартаж