Пошук

У Інстытуце тэалогіі БДУ адкрыліся XXXII Міжнародныя Кірыла-Мяфодзіеўскія чытанні

25 мая 2026

25 мая 2026 года ў Інстытуце тэалогіі імя святых Мяфодзія і Кірыла Беларускага дзяржаўнага ўніверсітэта адбылося ўрачыстае адкрыццё XXXII Міжнародных Кірыла-Мяфодзіеўскіх чытанняў «Жанчына ў гісторыі славянскага пісьменства і культуры». У вочным і дыстанцыйным фармаце форум аб'яднаў прадстаўнікоў духавенства, навуковай і культурнай грамадскасці, кіраўнікоў адукацыйных устаноў, выкладчыкаў, аспірантаў і студэнтаў дзяржаўных і царкоўных устаноў адукацыі.

Навуковая сустрэча праходзіць у горадзе Мінску 25-26 мая. Арганізатарамі форуму выступаюць Беларускі Экзархат, Міністэрства адукацыі Рэспублікі Беларусь, Інстытут тэалогіі імя святых Мяфодзія і Кірыла Беларускага дзяржаўнага ўніверсітэта, Інстытут гісторыі і сацыяльных навук Расійскага дзяржаўнага педагагічнага ўніверсітэта імя А.І. Герцэна, Лабараторыя этнарэлігійных даследаванняў Ніжагародскага Інстытута кіравання — філіяла РАНГіДС і Мінская духоўная акадэмія імя свяціцеля Кірыла Тураўскага.

З прывітальным словам да ўдзельнікаў чытанняў звярнуўся Мітрапаліт Мінскі і Заслаўскі Веніямін. Патрыяршы Экзарх адзначыў, што Кірыла-Мяфодзіеўскія чытанні больш за тры дзесяцігоддзі аб'ядноўваюць вучоных і спецыялістаў з краін блізкага і далёкага замежжа, якія працуюць у галіне багаслоўя, гісторыі, філасофіі, культуралогіі і рэлігіязнаўства. Штогод на гэтай пляцоўцы абмяркоўваюцца актуальныя праблемы сучаснасці, гуманітарных ведаў, міжкультурнага і міжканфесійнага дыялогу, узаемадзеяння навукі і рэлігіі, царкоўна-дзяржаўных адносін.

Гаворачы аб тэме цяперашняга форуму, Мітрапаліт Веніямін растлумачыў, што ў Год беларускай жанчыны ўдзельнікі чытанняў не могуць прайсці міма тэмы жаночага подзвігу і служэння, яго значэння для краіны, беларускай культуры і культуры іншых славянскіх народаў. Архіпастыр нагадаў аб святой роўнаапостальнай княгіні Вользе, святой прападобнай Еўфрасінні Полацкай і святой праведнай Сафіі Слуцкай. Па словах уладыкі, са старажытных часоў разам з вялікімі мужчынамі — стваральнікамі, малітоўнікамі і абаронцамі — шануюцца вялікія жанчыны, без якіх немажліва станаўленне дзяржаўнасці і культуры.

Асаблівую ўвагу Патрыяршы Экзарх надаў значэнню прападобнай Еўфрасінні Полацкай для беларускага народа: «Бо шмат у чым для нас, беларусаў, яна мае такое ж значэнне, як прападобны Сергій Раданежскі для Расіі і свяціцель Сава для Сербіі». Архіпастыр адзначыў, што праз жанчын вера часта захоўвалася не толькі ў храмах і манастырах, але і ў сям'і, культуры, асвеце, міласэрнасці і нацыянальнай памяці, а таксама ўказаў на задачу сучасных гісторыкаў — знаходзіць крыніцы, якія раскрываюць ролю жанчын у айчыннай гісторыі, і распавядаць пра тых працаўнікоў, без якіх немагчыма ўявіць атрыманае ў спадчыну духоўнае, інтэлектуальнае і культурнае багацце.

У завяршэнне выступлення Мітрапаліт Веніямін пажадаў удзельнікам чытанняў плённай працы і творчых размоў: «Няхай па малітвах святых вучыцеяў славянскіх Мяфодзія і Кірыла, святых жанчын, якія праславіліся на Беларускай зямлі, Гасподзь умацуе вас у асветніцкай працы, а цяперашні форум няхай паслужыць міру і росквіту нашай Айчыны».

Прывітанне Старшыні Савета Рэспублікі Нацыянальнага сходу Рэспублікі Беларусь Наталлі Качанавай агучыла Наталля Паўлючэнка, старшыня Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці.

Прывітанне Міністра працы і сацыяльнай абароны Рэспублікі Беларусь Андрэя Лабовіча зачытаў протаіерэй Сергій Маўсесян, першы прарэктар Інстытута тэалогіі БДУ.

Прывітанне Упаўнаважанага па справах рэлігій і нацыянальнасцяў Рэспублікі Беларусь Аляксандра Румака агучыў Сяргей Герасіменя, намеснік Упаўнаважанага па справах рэлігій і нацыянальнасцяў.

Прывітанне Архіепіскапа-мітрапаліта Мінска-Магілёўскага Іосіфа Станеўскага прамовіў доктар багаслоўя ксёндз канонік Ян Крэміс.

Прывітанне муфтыя Абу-Бекіра Шабановіча, старшыні РРА «Мусульманскае рэлігійнае аб'яднанне ў Рэспубліцы Беларусь», абвясціў Максат Авезаў, намеснік муфтыя, імам Мінскай саборнай мячэці, адказны за навукова-даследчы аддзел МРА ў Рэспубліцы Беларусь.

З прывітальнымі словамі да ўдзельнікаў чытанняў таксама звярнуліся прарэктар па вучэбнай рабоце і адукацыйных інавацыях Беларускага дзяржаўнага ўніверсітэта Алеся Прахарэнка; рабін Рыгор Абрамовіч, старшыня Аб'яднання іўдзейскіх рэлігійных суполак Рэспублікі Беларусь.

У ходзе ўрачыстага адкрыцця адбылося ўзнагароджанне лаўрэатаў прэміі імя мітрапаліта Філарэта (Вахрамеева) за навуковыя дасягненні студэнтаў.

Пасля ўрачыстай часткі прайшло пленарнае пасяджэнне. З дакладамі выступілі старшыня ГА «Беларускі саюз жанчын» Вольга Шпілеўская; протадыякан Павел Бубноў, кандыдат багаслоўя, выкладчык Мінскай духоўнай акадэміі і семінарыі. Даклад ігуменні Еўдакіі (Ляўшук), ігуменні Полацкага Спаса-Еўфрасіннеўскага жаночага манастыра, прачытала манахіня Іўсціна (Сімсан).

26 мая праграма чытанняў працягнецца Бажэственнай літургіяй у храме святых роўнаапостальных Кірыла і Мяфодзія, пленарным пасяджэннем, працай тэматычных і студэнцкіх секцый, а таксама круглым сталом «Хрысціянскі сацыялізм айца Сергія Булгакава».

Church.by

Чытайце нас у мэсэнджэрах Telegram і Viber, 

сацсетках Instagram, ВКонтакте, 

Facebook і Одноклассники,

глядзіце ў YouTube і TikTok

Фотарэпартаж